சிவஞானமாபாடியம் – வருணத்துவப் பகுதிகள் இடைச்சேர்க்கைகளே!

மாபாடியம் எழுதப்பட்டுப் பல வருடங்கள் வெளியார் யாரும் அறியாத வண்ணம் பாதுகாக்கப்பட்டு வைக்கப்பட்டிருந்த இடம் திருவாவடுதுறை ஆதீனம். அந்த ஆதீனத்தார் இதுநாள் வரையில் அதை வெளியிடவில்லை என்பது குறிப்பிடத்தக்கது.

சபாபதி நாவலர் என்பார் ஆதீனத்தின் அனுமதியின்பேரில் அங்கிருந்த பிரதிகளை வாங்கிச் சென்று படியெடுத்த பிறகு திரும்பவும் ஆதீனத்திடம் ஒப்படைக்கிறார். இலங்கையில் உள்ள வண்ணைநகர்ச் சுவாமிநாத பண்டிதர் என்பவர் மாபாடியத்தின் பிரதிகள் சபாபதி நாவலரிடம் இருப்பதை அறிந்து பதிப்பிக்கத் தந்துதவுமாறு கேட்கிறார். அதற்கு அந்த சபாபதி நாவலர் இரண்டாயிரம் ரூபாய் கேட்ட காரணத்தாலும், அப்பிரதிகள் யாவும் சேர்த்தல் நீக்கல் திரித்தல்களுடன் பிழை மலிந்து இருக்கும் நிலையை நம்பகமான ஒருவர் மூலம் அறிந்த காரணத்தாலும் வாங்கும் எண்ணத்தைத் தவிர்த்து விடுகிறார். பிறகு வேறொருவர் வைத்திருந்த அரைகுறைப் பிரதியை ஆய்வு செய்து சிற்றுரை கலந்து பதிப்பிக்கிறார்.இந்த நிகழ்வு நடந்த பல வருடங்களுக்குப் பிறகு சூரியனார் கோயில் ஆதீனத்தார் திருவாவடுதுறை ஆதீனத்தாரிடம் பெற்ற பிரதியைப் படியெடுத்து அச்சேற்றினர். அதுவே இப்போது பரவலாகப் பதிப்பிக்கப்படுவது. அஃதாவது சபாபதி நாவலர் துறைசை ஆதீனத்தாரிடம் திரும்ப ஒப்படைத்த சேர்த்தல் நீக்கல் திரித்தல்களுடன் கூடிய பிரதியைத்தான் சூரியனார் கோயில் ஆதீனத்தார் அச்சேற்றினர்.

இப்போதுள்ள மாபாடியத்தில் பல இடங்களில் பல செய்திகள் பாதியோடு நின்று போவதும், சில செய்திகள் நூலின் போக்கிற்கு மாறாக இருப்பதும், சில செய்திகள் முன்னொடு பின் முரணுவதும் நன்கு அறியப்படுகிறது.

இதை மாபாடியம் பாடம் கேட்ட அனைவரும், ஊன்றிப் படித்த அனைவரும் நன்கு அறிவார்கள்.

சில முரண்பாடுகளை மகாவித்துவான் அருணை வடிவேல் முதலியார் போன்ற பெரியவர்கள் விளக்கியுள்ளார்கள். எனக்கு மாபாடியம் நடத்திய பெரியவர்களும் வகுப்பில் பல இடங்களில் இதுபற்றி எடுத்துக்காட்டுகளுடன் சொல்லி இருக்கிறார்கள். அவ்வாறு முரண்பாடான பகுதிதான் சிறப்புப் பாயிரத்தில் வருணத்துவம் பற்றி வரும் பகுதியும்.

இதை மகாவித்துவான் அருணை வடிவேல் முதலியார் அவர்கள் தம்முடைய சிவஞான போத மாபாடியப் பொருள் நிலை விளக்கத்தில் விரிவாக எழுதியுள்ளார்கள். அதைப் படிப்பதற்கும் ஆராய்ச்சி செய்வதற்கும் சோம்பேறித்தனம் கொண்டவர்களால் இயலாது என்பதால் இங்கே எடுத்துக் காட்டுகிறேன். அப்பகுதி இதோ…

மேலும் பஞ்சாக்கர தேசிகர் வாக்காக அம்பலவாணதேசிக பரமாச்சாரியார் தம்முடைய சித்தாந்தப் பஃறொடையில் வருணத்துவத்தை மறுத்து எழுதியிருக்கிறார்.

(என்ன எழுதியுள்ளார்கள் என்று இங்கே வந்து கேட்பவர்கள் இருப்பார்கள். அவ்வளவு பெரிய நூலை இந்த முகநூலில் விரிவுரையாற்ற இயலாது என்றும், வேண்டுவோர் படித்தறிந்து கொள்ளுங்கள் என்றும் இப்போதே சொல்லி விடுகிறேன். படிப்பதற்கு இயலாத சோம்பேறிகளும் ஆராய்வதற்கு அறிவு இல்லாதவர்களும் படிக்காமலேயே ஆராயாமலேயே ஏதாவது பேசிக் கொண்டிருந்தால் அதற்கு யாரும் ஒன்றும் செய்ய முடியாது என்பதையும் இப்போதே சொல்லி விடுகிறேன்.)

அதேபோலச் சித்தாந்த சிகாமணி நூலில்,

“சாதியுற்றார்க்கில்லை தகும் சமயம் சங்கமமாம் நீதியுற்றார்க்கில்லை நிகழ்சாதி”

என்றும் எழுதியுள்ளார்கள். தம்முடைய ஆதீனத்தின் குரு முதல்வர் வாக்கை மீறிச் சைவத்தில் வருணத்துவம் உண்டு என்று மாதவச் சிவஞான சுவாமிகள் எழுதினார் என்பவர்கள் சுவாமிகளுக்கு மாபெரும் இழுக்கையே ஏற்படுத்துகிறார்கள் என்பது திண்ணம்! ஆகவே தற்போதைய பதிப்பில் உள்ள மாபாடியத்தை நன்கு ஆராய்ந்து முரண்பாடுகளை நீக்கிப் பயன்கொள்க!

திராவிட மாபாடியகர்த்தர் மாதவச் சிவஞான சுவாமிகள் திருவடிகள் போற்றி! போற்றி!